मतपत्रमा सूर्य पहिलो रुख दोस्रो

399 shares

काठमाडौँ । २०७९ वैशाख ३० गते हुने स्थानीय तहको निर्वाचनमा प्रयोग हुने मतपत्रमा नेकपा एमालेको चुनाव चिन्ह सूर्य पहिलो नम्बरमा रहने भएको छ ।

निर्वाचन आयोगले स्थानीय तह निर्वाचन ऐन २०७३ को दफा २६ को उपदफा ६ मा भएको व्यवस्थाअनुसार स्थानीय तहको निर्वाचनका लागि राजनीतिक दलको चुनाव चिह्नको रोलक्रम निर्धारण भएको हो । सो दफाको उपदफा ६ मा ‘निर्वाचन चिह्न मतपत्रमा समावेश गर्दा त्यस्तो दलले तत्काल अघि भएको प्रतिनिधि सभाको निर्वाचनमा समानुपातिक निर्वाचन प्रणालीतर्फ प्राप्त गरेको मत संख्याको आधारमा समावेश गरिनेछ ।’ भन्ने व्यबस्था छ ।

पछिल्लो निर्वाचनमा नेकपा एमालेले समानुपातिकतर्फ पहिलो मत प्राप्त गरेको थियो । नेपाली काँग्रेसले दोस्रो मत प्राप्त गरेकोले रुख चिन्ह दोस्रो स्थानमा रहने भएको छ । त्यस्तै,नेकपा माओवादी केन्द्रको गोलाकारभित्र हँसिया हथौडा तेस्रो, जसपाको ढल्केको छाता चौंथो, लोकतान्त्रिक समाजवादी पार्टी (लोपाका)को साइकल पाँचौं र नेकपा एकीकृत समाजवादीको चुनाव चिह्न कलम छैटौं नम्बरमा रहने भएको हो । यी ६ दल राष्ट्रिय मान्यता प्राप्त हुन् ।

यसैगरी, सातौं नम्बरमा विवेकशील साझा पार्टीको चिह्न तराजु, आठौंमा राप्रपाको हलो, नवौंमा जनमोर्चाको गिलास र १०औं नम्बरमा नेपाल मजदुर किसान पार्टीको चिह्न मादल रहने आयोगले जनाएको छ ।

399 shares