‘स्त्री २’ को दमदार ट्रेलर सार्वजनिक

काठमाडौँ । बलिउड हरर– कमेडी फिल्म ‘स्त्री २’ को ट्रेलर सार्वजनिक भएको छ । बिहीबार फिल्मको ३ मिनेटको ट्रेलर सार्वजनिक भएको हो ।

फिल्मको पहिलो पार्ट २०१८ मा आएको थियो । २५ करोडको बजेटमा बनेको फिल्मले त्यतिबेला भारतमा मात्रै १ सय ३० करोडको कलेक्सन गरेर सबैलाई चकित बनाएको थियो । दर्शकमा दोश्रो पार्टको व्यग्र प्रतिक्षा थियो । अब भने दर्शकको प्रतिक्षाको घडि समाप्त हुने भएको छ । आगामी अगस्ट १५ बाट फिल्मको सिक्वेल स्त्री २ प्रदर्शनमा आउँदैछ ।

दोश्रो भागमा स्त्री फर्किएकी छन् भने शिर काटिएको एक पुरुषले आतंक मच्चाइरहेको छ । यस्तोमा फिल्मको मुख्य पात्र विक्की (राजकुमार राव) र श्रद्धा कपुरले उक्त आतंक रोक्न गरेको संघर्ष दोश्रो पार्टमा देख्न सकिने छ ।

अमर कौशिकको निर्देशन रहेको फिल्ममा राजकुमार र श्रद्धाको साथमा पंकज त्रिपाठी, अपारशक्ति खुराना र अभिषेक बनर्जी लगायतका कलाकारको अभिनय रहेको छ । फिल्मको ट्रेलर दमदार देखिएकाले बक्सअफिसमा राम्रै कमाल देखाउन सक्ने अनुमान ट्रेड एनालिष्टहरुले गरेका छन् ।