‘स्त्री २’ को प्रदर्शन मिति प्रि–पोण्ड

काठमाडौँ । बलिउड हरर– कमेडी फिल्म ‘स्त्री २’ को प्रदर्शन मिति प्रि–पोण्ड भएको छ । यसअगाडि फिल्म १५ अगष्टमा प्रदर्शनमा आउने भएको थियो । अब, फिल्म एक दिन अगाडि १४ अगष्टमा प्रदर्शन हुने भएको हो ।

फिल्मको पहिलो पार्ट २०१८ मा आएको थियो । २५ करोडको बजेटमा बनेको फिल्मले त्यतिबेला भारतमा मात्रै १ सय ३० करोडको कलेक्सन गरेर सबैलाई चकित बनाएको थियो । दर्शकमा दोश्रो पार्टको व्यग्र प्रतिक्षा छ ।

दोश्रो भागमा स्त्री फर्किएकी छन् भने शिर काटिएको एक पुरुषले आतंक मच्चाइरहेको छ । यस्तोमा फिल्मको मुख्य पात्र विक्की (राजकुमार राव) र श्रद्धा कपुरले उक्त आतंक रोक्न गरेको संघर्ष दोश्रो पार्टमा देख्न सकिने छ ।

अमर कौशिकको निर्देशन रहेको फिल्ममा राजकुमार र श्रद्धाको साथमा पंकज त्रिपाठी, अपारशक्ति खुराना र अभिषेक बनर्जी लगायतका कलाकारको अभिनय रहेको छ । फिल्मको ट्रेलर दमदार देखिएकाले बक्सअफिसमा राम्रै कमाल देखाउन सक्ने अनुमान ट्रेड एनालिष्टहरुले गरेका छन् ।

फिल्ममा वरुण धवन ‘भेडिया’ को भूमिकामा छन् । फिल्ममा तमन्ना भाटिया पनि सानो भूमिकामा देखिनेछिन् ।