यस्तो बन्यो पल र पूजाको ‘रावायण’को ट्रेलर (भिडियो)

काठमाडौँ । सुदर्शन थापाको निर्देशनमा बनेको रावायणको ट्रेलर सार्वजनिक भएको छ । बिहीबार ओएसआर डिजिटलमार्फत ३ मिनेटको ट्रेलर सार्वजनिक गरिएको हो ।

निर्माण घोषणा गरेदेखि नै चर्चा र विवादमा रहेको फिल्मको प्रदर्शनको संघारमा आइपुग्दा प्रचार सामग्रीहरुले राम्रै हाइप बनाइरहेको छ । यसअगाडि सार्वजनिक गीत र टिजरले दर्शकमाझ कौतुहलता सिर्जना गर्न सफल भएको छ ।

आज सार्वजनिक भएको ट्रेलरमा फिल्मका मुख्य कलाकार फिचर्ड छन् । पल शाहको डबल रोल रहेकाले एक आपसमा भिडेको दृश्य पनि देख्न सकिन्छ । कलियुगमा रावणले लेख्ने रावायण भएको भन्ने थिम ट्रेलरमा देखाइएको छ । मुलत फिल्मको कथा न्याय र अन्यायको रहेको देखाइएको छ । पल शाहको कुनै एक पात्र पाइलट हुन सक्ने देखिएको छ । उता पूजा शर्माको पनि भूमिका चाख लाग्दै रहेको अनुमान गर्न सकिन्छ । प्रियंकाले बोलेको भाषा हिन्दी मिश्रीत देखिएकोले उनको पात्र पनि त्यहि खालको हुन सक्ने अनुमान गर्न सकिन्छ ।

शिवम् अधिकारीको कथा रहेको फिल्ममा पल शाहको साथमा पुजा शर्मा, प्रमोद अग्रहरी, प्रीयंका कार्की, निकिता चाण्डक लगायतका कलाकारको अभिनय रहेको छ । फिल्मलाई पुजा शर्मा प्रोडक्सन र सुदर्शन थापा प्रोडक्सनले निर्माण गरेको हो ।

लभस्टोरी जनरामा रुचाइएका निर्देशक थापाले एक्सन जनरामा पनि राम्रो सम्भावना देखाएका छन् । फिल्म भाद्र २१ गतेबाट प्रदर्शनमा आउँदैछ ।