‘शाम्बाला’ हेर्न नेपाल आउँदै बलिउडका अनुराग कश्यप र नवाजुद्दीन सिद्दीकी

1.23K shares

काठमाडौँ । भदौ २८ गतेबाट प्रदर्शनमा आउने चलचित्र ‘शाम्बाला’को प्रिमियरमा सहभागी हुनका लागि दुई बलिउडका कलाकार तथा निर्देशक नेपाल आउने भएका छन् । प्रिमियरमा सहभागीता जनाउनका लागि अभिनेता नवाजुद्दिन सिद्दीकी र निर्देशक अनुराग कश्यप नेपाल आउने भएका हुन् ।

फिल्मको प्रिमियर भदौ २३ गते राखिएको छ । यस्तोमा अनुराग र नवाज २२ गते नेपाल आउने भएका हुन् । उनिहरु विशेष अतिथिका रुपमा नेपाल आउन लागेका हुन् ।

शाम्बालालाई मिन बहादुर भामले निर्देशन गरेका छन् । फिल्म बर्लिन अन्तर्राष्ट्रिय फिल्म फेस्टिभलको मुख्य विधामा छनोट भएको थियो । त्यतिबेलै नवाजले फिल्म हेर्न भ्याएका थिए ।

हिमाली भेगकी गर्भवती महिलाले ल्हास्सामा हराएको श्रीमान खोज्दाको कथा समेटिएको फिल्ममा थिन्ले ल्हामो, सोनम तोप्देन, तेन्जिन दाल्हा, कर्मा शाक्य, लोटेन नम्लिङ लगायतका कलाकारको अभिनय रहेको छ।

1.23K shares