‘कल्ली’ मा उत्तम प्रधानको इन्ट्रि

काठमाडौँ । चलचित्र ‘कल्ली’ निर्माण घोषणासँगै चर्चा र विवादमा छ । फिल्ममा पहिलोपटक पल शाह र बेनिशा हमालले एकसाथ काम गर्ने पक्का भएको थियो । तर, कलाकारको फेरबदलसँगै फिल्म विवादमा पनि तानियो ।

यस्तोमा फिल्ममा कुनै समयमा सर्वाधिक रुचाइएका अभिनेता उत्तम प्रधानको इन्ट्रि भएको छ । पछिल्लो एक दशकदेखि अभिनय कर्मबाट विश्राम गरिरहेका प्रधान कल्लीबाट कमब्याक हुने भएका छन् । उनिसँग निर्माण टिमले कागजी सम्झौता गरिसकेको छ । फिल्मका निर्माता किरण नेपाली र लेखक तथा निर्देशक लक्ष्मण सुनार भारतको सिक्किम पुगेर उनिसँग सम्झौता गरेका हुन् ।

उत्तमको इन्ट्रिसँग फिल्मको लाइनअप रोचक बनेको छ । फिल्ममा यसअगाडि सौगात मल्ल, अर्पण थापा, बुद्धि तामाङ, कमलमणि नेपाल अनुबन्धित भइसकेका छन् । अभिनेत्रीको भने टुंगो लाग्न बाँकी छ ।

अगामी चैत्र २९ गतेबाट प्रदर्शन हुने फिल्ममा महेश दवाडीको पटकथा तथा संवाद छ ।