होम प्रोडक्सन बाहिरको फिल्म गर्दै सुहाना थापा

काठमाडौँ । अभिनेत्री सुहाना थापा कथाकार गुरुप्रसाद मैनालीको चर्चित कथासंग्रह ‘नासो’मा सङ्ग्रहित ‘परालको आगो’ कथामा आधारित भएर निर्माण हुन लागेको फिल्ममा अनुबन्धित भएकी छन् । निर्माण टिमसँग थापाले कागजी सम्झौतासमेत गरिसकेकी छन् ।

फिल्ममा सहाना गौँथलीको भूमिकामा देखिनेछिन् । फिल्म ‘ए मेरो हजुर ३’बाट डेब्यु गरेकी सुहानाले पहिलोपटक घरबाहिरको फिल्ममा काम गर्न लागेकी हुन् । गत वर्ष फिल्म ‘एक भागवत् एक गीता’मा देखिएकी उनले ‘ए मेरो हजुर ४’मा पनि प्रमुख भूमिका निभाएकी छन् ।

लक्ष्मण सुनारको निर्देशनमा बन्ने फिल्म आगामी वर्षको दशैँमा प्रदर्शन गर्ने लक्ष्य निर्माण टिमको रहेको छ । फिल्ममा सुशील देवकोटाको लेखन रहनेछ ।