‘टुभेल्थ फेल’ बन्यो ३ दिनमै ओटीटीमा सबैभन्दा बढी हेरिने फिल्म

काठमाडौँ । विधु विनोद चोपडा द्वारा निर्देशित फिल्म ‘टुभेल्थ फेल’ ओटीटीमा पनि तहल्का पिट्न सफल भएको छ । फिल्म डिस्ने प्लस हट स्टारमा २९ डिसेम्बरमा रिलिज भएको थियो । फिल्मले तीन दिनमै वर्षको सबैभन्दा धेरै ओटीटीमा हेरिएको फिल्मको रेकर्ड बनाएको छ ।

सक्निल्कका अनुसार २० करोडमा बनेको यो फिल्मले विश्वभर ६६.५ करोड कमाएको छ । फिल्ममा विक्रान्त मास्सेले आईपीएस अफिसर मनोज कुमार शर्माको भूमिका निर्वाह गरेका छन् ।

डिज्नी प्लस हटस्टारका कन्टेन्ट हेड गौरव बनर्जीले लाइभ मिन्टलाई दिएको अन्तर्वार्तामा फिल्मले निकै राम्रो प्रदर्शन गरिरहेको बताए । तीन दिनमै यो फिल्म सन् २०२३ को सबैभन्दा धेरै हेरिएको फिल्म बनेको छ । बनर्जीले यो पनि भने, ‘हाम्रा दर्शकहरूले यो फिल्मलाई कति तीव्रताका साथ हेरिरहेका छन् र यससँग जोडिएका छन् भनेर देखेर हामी छक्क परेका छौं। कथालाई पनि राम्रोसँग प्रस्तुत गरिएको छ ।’ यो अन्तर्वार्तामा उनले विधु विनोद चोपडाको निर्देशनको पनि तारिफ गरेका छन् ।

हलमा रिलिज हुनुअघि नै फिल्मको कुनै विशेष प्रचार भएको थिएन । चलचित्रको माउथ पब्लिसिटीबाट धेरै प्रचार भयो र दर्शकहरु क्रमशः चलचित्र हेर्न हलमा आउन थाले । जबकि फिल्म पनि निकै सीमित हलमा रिलिज भएको थियो । यो फिल्म ६०० स्क्रिनमा मात्रै रिलिज भएको थियो । अब ओटीटीमा रिलिज भएपछि फिल्मले धेरैभन्दा धेरै दर्शकमाझ पुगेको छ । तीन दिनमा यो वर्षको सबैभन्दा धेरै हेरिएको चलचित्रले धेरैले चलचित्र हेरिरहेको देखाएको छ ।