‘कंगारु’मा स्वस्तिमा खड्का

काठमाडौँ । सम्राट बस्नेतको निर्देशनमा निर्माण हुन लागेको चलचित्र ‘कंगारु’मा अभिनेत्री स्वस्तिमा खड्का अनुबन्धित भएकी छन् । सोमबार उनले निर्माण पक्षसँग कागजी सम्झौता गरेकी हुन् ।

फिल्ममा यसअगाडि केदार घिमिरे ‘माग्ने बुढा’, जितु नेपाल र अर्पण थापा अनुबन्धित भइसकेका छन्। स्वस्तिमाको इन्ट्रिसँगै फिल्ममा कलाकारको लाइनअप बलियो बनेको छ । स्वस्तिमा पछिल्लो समयको नम्बर १ नायिकाको रुपमा परिचित छिन् ।

राजिव गुरूङ ‘दीपक मनाङ्गे’ को प्रस्तुति रहने फिल्मलाई सस्पेन्स, थ्रीलर र कमेडी जनरामा निर्माण गरिनेछ । फिल्मलाई फुलमुन मोसन पिक्चर्स र उत्तरगया म्युजिक एन्ड फिल्मसँग एसजिटी प्रोडक्सन प्रालीको सहकार्यमा निर्माण गरिने भएको हो ।

फिल्ममा प्रेम थापा, धन बहादुर गुरूङ ‘डिबी’ र मनोज भण्डारी ‘म्यक्स’ को लगानी रहनेछ । फिल्मका सह–निर्मातामा अन्जन दुरा र लक्ष्मी राई हुन् भने कार्यकारी निर्माता टीका भण्डारी हुन्।

सीमा गुरूङको कथा रहेको फिल्मको छायांकन फिल्मलाई अस्ट्रेलियामा छायांकन गर्ने तयारी रहेको छ। फिल्मलाई सुशन प्रजापतिले खिच्नेछन्।

स्वस्तिमाको ‘बेहुली फ्रम मेघौली’ प्रदर्शनको तयारिमा छ ।