दीपेन्द्रको ‘घर नम्बर २’ माघमा रिलिज हुने

काठमाडौँ । दीपेन्द्र के खनालको नयाँ चलचित्र ‘के घर के डेराः घर नम्बर २’ को प्रदर्शन मिति तोकिएको छ । हाल छायांकन भइरहेको फिल्म माघ ११ गतेबाट प्रदर्शनमा आउने भएको हो ।

साउन २५ गतेबाट छायांकनमा निस्किएको निर्माण टिमले सार्वजनिक विदाको मौका छोपि प्रदर्शन मिति तय गरेको छ । एक महिनाको छायांकन सेड्युल रहेको फिल्मको कथा बुद्धिसागरले लेखेका हुन् ।

फिल्ममा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरी, प्रकाश घिमिरे लगायतका कलाकारको अभिनय रहेको छ । सोसल कमेडि जनरामा बन्ने फिल्ममा कृष्णबहादुर थापाको छायांकन रहनेछ ।

फिल्म ए प्लस इन्टरटेन्मेन्ट र नटराज क्रियशनको ब्यानरमा निर्माण भइरहेको छ । फिल्ममा शरद श्रेष्ठ, किरण महर्जन र राजीव श्रेष्ठको लगानी छ भने युवराज कार्की कार्यकारी निर्माता रहेका छन् । फिल्मका सह निर्माता ओम प्रकाश अग्रवाल र महेश किजु हुन् ।