‘१२ गाउँ’को ‘सिनेमा हेर्न जाउँ’ सार्वजनिक

काठमाडौँ । विराज भट्टको निर्देशनमा बनेको फिल्म १२ गाउँको सिनेमा हेर्न जाउँ गीत सार्वजनिक भएको छ । शनिबार फिल्मको डान्सिङ गीत सार्वजनिक भएको हो ।

अर्जुन पोखरलेको शब्द तथा संगीत रहेको गीतमा भारतीय गायक नकाश अजिजको स्वर छ । गीतमा डेब्यु नायक समीर भट्ट र सोनु चन्द्रपाल फिचर्ड छन् । भिडियोमा समीरको डान्सिङ कला देख्न सकिन्छ । समीरले एक्सनमा गरेको मेहनत टिजरमा देखेका थियौँ । उनले डान्समा गरेको मेहनत भिडियोमा देखिएको छ । भिडियोलाई सुनिल क्षेत्रीले कोरियोग्राफ गरेका छन् ।

फिल्ममा समीर र सोनुको साथमा न्यान्सी खड्का, सनिषा भट्टराइ, मुरलीधर, कनिज कोइराला, नरेन खड्का, दीया मास्के कृष्ण भट्ट लगायतका कलाकारको अभिनय रहेको छ ।

फिल्मलाई विराज भट्ट प्रोडक्सनको प्रस्तुतिमा तयार गरिएको हो । फिल्ममा विराजकै कथा र सन्तोष सरकारको पटकथा तथा संवाद छ । फिल्म असोज २४ गतेबाट प्रदर्शनमा आउँदैछ ।